Mavs kakasahan ang Warriors sa West Finals

PHOENIX — Humakot si star guard Luka Doncic ng 35 points, 10 rebounds at 4 assists para pamunuan ang Dallas Mavericks sa 123-90 pagpapatalsik sa Suns sa Game Seven ng kanilang semifinals series papasok sa Western Conference finals.

Nagdagdag si Spencer Dinwiddie ng 30 markers para sa unang conference finals appearance ng Dallas sapul noong 2011.

Magtutungo ang Mavericks sa San Francisco para labanan ang Golden State Warriors sa Game One sa Huwebes.

Iginiya ni Doncic ang Dallas sa 27-17 abante sa first quarter bago ibaon ang Phoenix sa halftime, 57-27.

Ang Phoenix ang ikalawang koponan sa NBA history na naipanalo ang 64 games sa regular season, ngunit bigong makapasok sa conference finals matapos ang Dallas noong 2007.

Sa Boston, nagpasabog si Grant Williams ng career-high na 27 points kasama ang pitong 3-pointers sa 109-81 pagpapatalsik ng Celtics sa nagdedepensang Milwaukee Bucks sa Game Seven ng kanilang semis duel patungo sa Eastern Conference finals.

Nag-ambag si Jayson Tatum ng 23 markers para sa Boston na nagposte ng Game Seven record na 22 triples.

Lalabanan ng Celtics ang Miami Heat sa rematch ng 2020 East finals.

Tinalo ng Miami ang Boston, 4-2, sa nasabing serye na idinaos sa Walt Disney World.