Yulo isinirko ang ika-3 ginto
Team Philippines umakyat sa no. 3
MANILA, Philippines — Hindi lumaylay ang kampanya ng Team Philippines matapos magsubi ng pitong gintong medalya tampok ang mga panalo ng isang two-time world champion gymnast at tatlong Pinay sa 31st Southeast Asian Games sa Hanoi, Vietnam.
Inangkin ni gymnast Caloy Yulo ang kanyang ikalawa at ikatlong gold medals nang maghari sa men’s floor exercise at still rings para idagdag sa naunang panalo sa individual all-around.
Kumolekta ang Tokyo Olympian ng 15.200 points sa floor exercise at 14.400 points sa still rings.
Itinakbo naman ni Kim Mangrobang ang kanyang ikalawang gold matapos magreyna sa women’s duathlon sa bilis na 2:13.12 isang araw makaraang maidepensa ang kanyang korona sa women’s individual event ng triathlon.
Nakamit ni Fil-Am gymnast Aleah Finnegan ang ikalawa niyang gold medal sa women’s vault matapos igiya ang women’s team sa tagumpay kamakalawa.
Ginto rin ang kinuha nina wushu artists Agatha Wong (women’s taijijian) at Arnel Mandal (men’s sandra 56kg) at William Morrison (men’s shot put) sa athletics.
Sinira ni Morrison ang sarili niyang SEA Games record para sa bagong 18.41m mark.
Kumubra ng silver medal sina Janry Ubas (men’s long jump), fencer Nathaniel Perez (men’s foil individual) at jiu-jitsu fighter Jollirine Co (women’s U-45kg. nogi).
Nag-ambag ng bronze sina Sonny Wagdos (men’s 5000m run), Joida Gagnao (women’s 3000m steeplechase), cyclists Naomi Gardoce (women’s MTB downhill individual) at John Derick Farr (men’s MTB downhill individual), tennis players Alex Eala, Marian Capadocia, Shaira Rivera at Jenaila Prulla (women’s team event), jiujitsu fighters Jan Vincent Cortez (men’s U-56kg nogi) at Marc Lim (men’s -69kg) at pencak silat warrior Alvin Campos (men’s tanding Class F),
Sa golf, bigo si Lois Kaye Go sa bronze medal nang tumapos sa ikaapat sa women’s individual play.
- Latest
