Blue Eagles tatapusin na ang kamalasan vs Lady Tamaraws
MANILA, Philippines — Inaasahang gagawa ng paraan ang defending champions Ateneo Blue Eagles upang tuldukan ang kanilang kamalasan sa nagaganap na UAAP Season 84 women’s volleyball tournament.
Bokya pa rin sa panalo ang Blue Eagles matapos malasap ang ikatlong sunod na kabiguan nang dagitin sila ng Adamson University Lady Falcons, 25-23, 19-25, 15-25, 12-25 noong Martes.
Susubukan muli ng Ateneo na sandalan si Faith Nisperos sa pagharap nila sa Far Eastern University Lady Tamaraws ngayong alas-12 ng tanghali sa SM Mall of Asia Arena.
Si Nisperos ang namuno sa opensa para sa Blue Eagles matapos ilista ang 16 puntos, 14 na kills at tig-isang service ace at block sa kanilang talo sa Adamson.
Tiyak naman na hindi magiging madali para sa Ateneo na masilo ang unang panalo dahil target ng Lady Tams na suwagin ang pangalawang sunod na panalo.
Tangan ng FEU ang 1-2 record.
Samantala, magpapaluan ang UE at National University Lady Bulldogs sa alas-10 ng umaga, magkatapat ang Adamson at University of the Philippines Fighting Maroons sa alas-4 ng hapon habang magtitipan ang De La Salle University Lady Spikers at University of santo Tomas Golden Tigresses sa alas-6 ng gabi.
- Latest
