Cebu Chooks sibak sa FIBA 3x3 Dubai Expo
MANILA, Philippines — Pumalag ang Cebu Chooks subalit kinapos din sa dulo at napatalsik sa 2022 FIBA 3x3 Dubai Expo Super Quest kahapon sa Expo Sports Arena sa Dubai.
Matapos ang malaking panalo kontra sa Chicago ng USA, nakipagsabayan ang Philippine club sa World No. 2 Antwerp ng Belgium bago tumirik sa 12-19 kabiguan.
Tig-tatlong puntos ang inilista nina Mac Tallo, Zach Huang, Brandon Ramirez at Mike Nzeusseu sa dikit na kabiguan at bigong makaabante sa semis hawak ang 1-2 kartada.
Kinapos din ang Cebu Chooks sa World No. 4 na Riga ng Latvia, 21-17, bago silatin ang Chicago, 21-15, sa likod ng 10 markers ni Tallo.
Kagaya ng Cebu Chooks ay sibak din ang Chicago (0-3) habang umabante sa Final Four ang Riga (3-0) at Antwerp (2-1) na binabanderahan ng ilang top 3x3 players sa mundo.
Dahil sa impresibong kampanya, nagtapos sa ikaanim na puwesto ang Cebu Chooks sa unahan ng kulelat na Lausanne (0-3) at Chicago (0-3), ayon sa pagkakasunod, sa 8-team Dubai tourney.
Nasa ikalimang puwesto ang San Juan ng Puerto Rico habang makakaharap ng Riga at Antwerp sa semis ang Liman ng Serbia at Warsaw ng Poland.
- Latest
