Curry nagpasabog

NEW YORK — Nagpasabog si Stephen Curry ng 37 points tampok ang kanyang season best na siyam na three-point shots sa pagdadala sa Golden State Warriors sa 117-99 panalo kontra sa Brooklyn Nets.

Dumikit si Curry kay Ray Allen bilang ikalawang player sa NBA history na nagsalpak ng 2,900 career 3-pointers triples.

May NBA record na 2,973 triples ang retirado nang si Allen para pangunahan ang listahan.

Ibinangon ni Curry ang NBA league-leader na Warriors (12-2) mula sa naunang kabiguan sa Charlotte Hornets noong Linggo na tumapos sa kanilang seven-game winning streak.

Nagdagdag si Andrew Wiggins ng 19 points, habang may 17 markers si Jordan Poole at kumolekta si Draymond Green ng 11 points, 8 rebounds at 7 assists para sa Golden State.

Umiskor si James Harden ng 24 points sa panig ng Brooklyn (10-5) kasunod ang 19 markers ni Kevin Durant.

Humataw ang Warriors ng 35 points sa kabuuan ng third period kumpara sa 18 markers ng Nets para iposte ang 98-76 kalamangan papasok sa fourth quarter.

Sa Salt Lake City, kumamada si Bojan Bogdanovic ng season-high 27 points para tulungan ang Utah Jazz (9-5) sa 120-85 paggiba sa Philadelphia 76ers (8-7).

Nagdagdag si Fil-Am guard Jordan Clarkson ng 20 points at humakot si  center Rudy Gobert ng 15 points, 17 rebounds at 4 blocks para sa Jazz.

Pinamunuan ni Shake Milton ang 76ers, nahulog sa kanilang pang-limang

sunod na kabiguan, sa kanyang 18 points kasunod ang 16 markers ni

Tyrese Maxey.

Nasa ilalim pa rin sina Joel Embiid at Matisse Thybulle sa NBA health

and safety protocols.

Sa Los Angeles, tumipa si Paul George ng 34 points para banderahan ang

Clippers (9-5) sa 106-92 pagdaig sa San Antonio Spurs (4-10).