Magnolia nagpapakondisyon

MANILA, Philippines — Kumpiyansa ang nangungunang Magnolia Hotshots na mapapanatili ang mataas na lipad sa 2021 PBA Philippine Cup kapag balik-aksyon na ang liga mula sa pahinga bunsod ng mahigpit na restrictions sa National Capital Region.

Tuloy ang pagpapakondisyon ng Hotshots para sa pulido pa ring momentum kapag nabigyan na ng go-signal ang PBA sa Pampanga upang doon ituloy ang mga laro mula sa NCR na nasa ilalim ng enhanced community quarantine (ECQ) hanggang Agosto 20.

Rumatsada ang Hotshots sa 4-0 upang masolo ang tuktok ng standings bago suspindihin muna ng PBA ang mga laro noong nakaraang Miyerkules.

“Masaya kasi maganda ‘yung start namin pero  hindi doon magtatapos iyon. We will work again after this break para kunin ulit ‘yung rhythm at momentum namin,” ani coach Chito Victolero.