NLEX diniskaril ang Ginebra

Back-to-back wins sa Meralco

MANILA, Philippines — Diniskaril ng NLEX ang debut game ni Christian Standhardinger para sa Barangay Ginebra matapos kunin ang 94-75 panalo sa 2021 PBA Philippine Cup kahapon sa Ynares Sports Arena sa Pasig City.

Kumamada si guard Kevin Alas ng 20 points at may 19 markers si Kiefer Ravena para sa 1-1 record ng Road Warriors.

“Actually, I expected us to play decently pero hindi ko inaasahan na ganoon kalaki iyong lamang namin,” ani coach Yeng Guiao. “We’re just veryy lucky that we got them on their first game.”

Tumapos naman si Standhardinger na may 8 points at 10 rebounds sa kanyang debut game para sa nagdedepensang Gin Kings ni mentor Tim Cone.

Inilista ng NLEX ang 20-point lead, 70-50, sa huling dalawang minuto ng third period at binitbit ang 91-73 patung sa huling 1:38 minuto ng laro para sa kanilang 1-1 record.

Sa unang laro, nalampasan ng Meralco ang pagbangon ng San Miguel mula sa 15-point deficit sa third period para kunin ang 93-87 panalo.

Ito ang ikalawang sunod na ratsada ng Bolts na nakahugot kay Chris Newsome ng 17 points at nag-ambag sina Aaron Black, Reynel Hugnatan at Nards Pinto ng 14, 13 at 11 markers, ayon sa pagkakasunod.

Kumamada si Terrence Romeo ng 18 points sa panig ng Beermen bago nagkaroon ng hyperextended left knee sa third quarter at hindi na nagbalik sa laro.

Nagdagdag sina CJ Perez at Mo Tautuaa ng tig-17 markers at may 11 points si Marcio Lassiter.