Tatum 50 pts. sa panalo ng Celtics

BOSTON — Nagpasabog si Jayson Tatum ng playoff career-high 50 points para dalhin sa kanyang mga balikat ang Celtics sa 125-119 pagresbak sa Brooklyn Nets sa Game Three ng kanilang Eastern Conference first-rou playoffs series.

Nag-ambag si Marcus Smart ng 23 points para dumikit ang Boston sa 1-2 sa kanilang best-of-seven series ng Brooklyn.

Nagbalik si Tatum sa lineup matapos maglaro ng 21 minuto sa Game Two nang aksidenteng matusok sa kanang mata ni Kevin Durant.

Humakot si center Tristan Thompson ng 19 points at 13 rebounds at may 17 markers si Evan Fournier para sa Celtics na itinayo ang 12-point lead, 96-84, sa fourth period.

Pinangunahan ni James Harden ang Nets sa kanyang 41 points kasunod ang 39 at 16 markers nina Durant at Kyrie Irving, ayon sa pagkakasunod.

Sa Atlanta, nagsumite si Trae Young ng 21 points at 14 assists para sa 105-94 pagdagit ng Hawks sa New York Knicks sa Game Three at kunin ang 2-1 abante sa kanilang serye.

Kumonekta si Danilo Gallinari ng perpektong 4-of-4 shooting sa 3-point line sa pagbangon ng Atlanta sa 92-101 kabiguan sa Game Two.

Pinamunuan ni Derrick Rose ang Knicks sa kanyang 30 points at may 14 markers si Most Improved Player Julius Randle.

Sa Dallas, humataw si Kawhi Leonard ng 36 points kasunod ang 29 markers ni Paul George sa 118-108 pagbawi ng Los Angeles Clippers kontra sa Mavericks para sa kanilang 1-2 agwat sa serye.

Binanderahan ni Luka Doncic ang Mavericks sa kanyang playoff career-high 44 points bukod pa ang 9 assists at 9 boards at nag-ambag sina Maxi Kleber at Jalen Brunson ng tig-14 markers.

Kinuha ng Dallas ang 30-11 sa first period hanggang maagaw ng Los Angeles ang 112-110 abante sa huling apat na minuto ng fourth quarter.