Diaz maagang bumiyahe pa-Tashkent

MANILA, Philippines — Mas minabuti ni national lady weightlifter Hidilyn Diaz na maagang bumiyahe patungong Tashkent, Uzbekistan para sa paglahok sa Asian Weightlifting Championships.

“Pray for our safety and hope the team Philippines will perform well in Olympic Qualifying,” wika ng 30-anyos na tubong Zamboanga City sa kanyang pagtungo sa Tashkent kasama sina Chinese head coach Kaiwen Gao, strength and conditioning coach Julius Naranjo at therapist Belen Banas.

Ang torneo, nakatakda sa Abril 16 hanggang 21, ang pinakahuling qualifying meet  ng weightlifting para sa 2021 Olympic Games na idaraos sa Tokyo, Japan sa Hulyo 23 hanggang Agosto 8.

Bilang kanyang ikaanim na Olympic qualifier ay popormalisahin ni Diaz ang pagbulsa sa pang-apat niyang Olympic appearance matapos noong 2008 (Beijing), 2012 (London) at 2016 (Rio de Janeiro, Brazil) kung saan niya binuhat ang silver medal sa women’s 53-kilogram.

Hangad ni Diaz na makasama ang mga nauna nang Olympic qualifiers na sina gymnast Carlos Edriel Yulo, pole vaulter Ernest John Obiena at boxers Eumir Felix Marcial, Irish Magno, Nesthy Petecio at Carlo Paalam.

Huling sumali si Diaz sa isang torneo noong Enero ng 2020 sa Roma World Cup sa Italy kung saan siya bumuhat ng tatlong gold medals.

Gintong medalya rin ang inangkin ni Diaz sa online Eleiko Email International Lifters tournament noong Hulyo ng nasabing taon.

Makakasama ni Diaz, ang 2019 Southeast Asian Games gold medal winner, sa kampanya sa Asian Weightlifting Championships sina Kristel Macrohon, Elreen Ando, John Febuar Ceniza at John Dexter Tabique.