Hidilyn Diaz maagang pupunta sa Uzbekistan

MANILA, Philippines — Isang linggo bago ang pagdaraos ng Asian Weightlifting Championships ay magtutungo na si national lady weightlifter Hidilyn Diaz sa Tashkent, Uzbekistan para sa nasabing Olympic Games qualifying tournament.

Sa isang panayam sa “So She Did!” podcast mula sa Malacca, Malaysia ay sinabi ni Diaz na gusto lamang niyang makatiyak na makakalahok siya sa kanyang ikaanim na Olympic qualifier.

“Mahirap na, baka mahawa ka sa iba,” wika ng 2016 Rio de Janeiro silver medalist. “So mas okay ‘yung nandoon ka, at prepared ka. Mas okay na prepared ka talaga.”

Kailangan lamang sumali si Diaz sa Asian Weightlifting Championships sa Tashkent, Uzbekistan na nakatakda sa Abril 16-25 para pormal na  angkinin ang tiket sa 2021 Olympics na gagawin sa Tokyo, Japan.

Base sa Olympic qualifying ratings process ng International Weightlifting Federation (IWF) ay dapat sumabak ang mga Olympic hopefuls sa anim na IWF-sanctioned competitions para makakuha ng silya sa quadrennial event na nakatakda sa Hulyo 23 hanggang Agosto 8.

Umaasa ang 30-anyos na tubong Zamboanga City na matutuloy ang Tokyo Olympics na naurong dahil sa coronavirus disease (COVID-19) pandemic.

“Ang daming atleta na nag-sakripisyo, ang daming atleta na ginive up lahat for Olympics, then hindi matutuloy,” sabi ng 2019 Southeast Asian Games gold medalist.

Kumpiyansa si Diaz na makakasama niya sa kampanya sa 2021 Tokyo Olympics sina pole vaulter Ernest John Obiena, gymnast Carlo Edriel Yulo at boxers Eumir Felix Marcial, Irish Magno, Nesthy Petecio at Carlo Paalam.

Mula nang magtungo sa Malaysia noong nakaraang taon ay hindi pa nakakauwi si Diaz sa Pilipinas.

“Iyong advantage namin na nandito kami sa Malacca is nasa backyard gym kami. So kahit mag-lockdown o hindi, nakakapag-training pa rin kami,” ani Diaz.