PSA President’s Award igagawad kay Tolentino

MANILA, Philippines — Isa si Abraham ‘Bambol’ Tolentino sa mga personalidad na gumiya sa Philippine sports sa gitna ng pandemya.

Igagawad ng Philippine Sportswriters Association (PSA) kay Tolentino, ang pangulo ng Philippine Olympic Committee (POC), ang President’s Award sa SMC-PSA Annual Awards Night sa Marso 27 sa TV5 Media Center.

Bilang kinatawan ng ika-8 Distrito ng Cavite ay ipinasok ni Tolentino ang P180-million item sa “Bayanihan to Recover as One Act 2” na nagbigay ng benepisyo sa mga national athletes at coaches.

Sa bersyon ng House of Representative sa Republic Act. No. 11494 ay nagsimulang matanggap ng mga miyembro ng national team ang kanilang mga monthly allowances noong Nobyembre matapos tapyasan ng gobyerno ng 50 porsiyento para sa anti-COVID-19 pandemic campaign. “Even before the din of the victorious Philippine campaign in the 2019 Southeast Asian Games was over, he proceeded to lead the way for Philippine sports through uncertainty and darkness wrought upon by an invisible and merciless adversity in 2020,” ani PSA president Tito S. Talao, ang Manila Bulletin sports editor, kay Tolentino.

Makakahanay ni Tolentino ang mga special awardees na pararangalan ng pinakamatandang media organization sa event na inihahandog ng Philippine Sports Commission (PSC) at Cignal TV katuwang ang 1 Pacman Partylist, Chooks-to-Go at Rain or Shine bilang major backers.

Muling nahalal si Tolentino sa Olympic governing body noong Nobyembre at bago matapos ang 2020 ay nakuha niya ang ikalawang sunod na termino sa International Cycling Federation of the Philippines (PhilCycling).