Season best jump ni Obiena para sa bronze
MANILA, Philippines — Isa na namang podium finish para kay Tokyo Olympics-bound pole vaulter Ernest John Obiena matapos ibigay ang kanyang pinakamagandang performance ngayong taon.
Lumundag ang 24- anyos na si Obiena ng 5.80 metro sa kanyang ikatlong attempt para angkinin ang tansong medalya sa Rome leg ng Diamond League sa Stadio Olimpico sa Italy.
Ito ang season-best performance ni Obiena sa kanyang mga nilahukang kompetisyon ngayong taon bilang paghahanda sa 2021 Olympic Games sa Tokyo, Japan.
“My third bronze/6th medal of the season, against the top pole vaulters in the world,” ani Obiena. “It was a tough competition but it pushed me to record a 5.80m season’s best. See you in Doha next week.”
Sa walong torneong nilahukan ng 2019 Southeast Asian Games gold medalist ay nakapagbulsa na siya ng isang ginto, dalawang pilak at tatlong tansong medalya.
Nakatakda siyang sumabak sa Doha Diamond League sa Set-yembre 24.
Nagtala rin ng 5.80m si Ben Broeders ngunit nairehistro ito ng Belgian sa kanyang ikalawang attempt lamang para agawin ang silver medal.
Nabigo na naman ang 6-foot-2 na si Obiena na talunin si world record-holder Armand Duplantis ng Sweden na nagposte ng 6.15m para burahin ang 26-year-old world record na 6.14m ni pole vault great Sergey Bubka para sa gold medal.
“I think I’m still up in the clouds right now,” sabi ng 20-anyos na US-born athlete na si Duplantis. “It’s a surreal, super crazy feeling.”
Ang dating record ay naitala ng Ukranian great na si Bubka noong Hulyo ng 1994 sa Italy.
- Latest
