2-0 bentahe sa Raptors, Celtics

LAKE BUENA VISTA, Florida — Gumamit si Toronto Raptors head coach Nick Nurse ng small line-up habang sumandal ang Boston Celtics kay Jayson Tatum para iposte ang 2-0 abante sa kani-kanilang first-round playoff series kahapon.

Pinatumba ng Raptors ang Brooklyn, 104-99, kung saan ginamit ni Nurse si forward Pascal Siakam bilang sentro habang nagsalpak si guard Fred VanVleet ng 24 points at may 10 assists para sa Eastern  Conference No. 2 seed.

“It’s all feel,” sabi ni Nurse sa paggamit niya kay Siakam kasama sina VanVleet, Kyle Lowry, Norman Powell at OG Anunoby. “I have tried to get my five guys who have played the best on the floor late.”

Nagdagdag si Powell ng 24 points at may 21 markers si Lowry para sa NBA defending champions.

Kinuha rin ng No. 3 Celtics ang 2-0 bentahe sa kanilang serye ng No. 6 Philadelphia 76ers sa 128-101 panalo tampok ang 33 points ni Jayson Tatum.

Tumipa si Kemba Walker ng 22 points kasunod ang 20 markers ni Jaylen Brown para sa Celtics, naglaro na wala si starting forward Gordon Hayward na nadale ng right ankle sprain noong Game One.

Samantala, umiskor si Luka Doncic ng 28 points para tulungan ang No. 7 Dallas Mavericks na resbakan ang No. 2 Los Angeles Clippers, 127-114 para itabla sa 1-1 ang kanilang Western Conference playoff series.

Nag-ambag si Kris-taps Porzingis ng 23 points para sa unang panalo ng Mavericks sa kanilang limang banggaan ng Clippers nga-yong season.

Binanderahan ni Kawhi Leonard ang Clippers sa kanyang 35 points at 10 rebounds.

Itinabla rin ng No. 6 Utah Jazz ang kanilang serye ng No. 3 Denver Nuggets sa 1-1 makaraang angkinin ang 124-105 tagumpay.

Humugot si Donovan Mitchell ng 21 sa kanyang 30 points sa third quarter para pangunahan ang Jazz habang kumamada si Fil-Am guard Jordan Clarkson ng personal playoff-best na 26 points.