Gagate impresibo sa unang laro sa UAAP
MANILA, Philippines — Sa unang pagsalang niya sa UAAP Season 82 women’s volleyball tournament ay kaagad nagpakilala ang rookie middle blocker na si Thea Gagate nang tulungan niya ang De La Salle University na maiuwi ang unang panalo sa liga.
Nakapitan ng Lady Spikers si Gagate kontra sa Ateneo Lady Eagles noong Sabado matapos siyang magrehistro ng 10 points, kabilang ang 5 kill blocks.
Nagawa mang magpabilib sa kanyang senior’s debut laban sa defending champions ay aminado si Gagate na kinabahan siya lalo na’t hindi siya sanay na maglaro sa harap ng malaking bilang ng mga fans.
“Hearing from the dugout pa lang like ‘yung dreams, and ‘yung crowd na puro sigaw, nakakakaba po talaga siya. Pero I just like relax myself na hindi masyadong iisipin ‘yung crowd kasi ako naman ‘yung naglalaro,” sabi ni Gagate.
“Gina-guide rin po ako ng mga ate namin na kalma lang, tapos ‘yung coaches. Since sila po ‘yung mas may experience kesa sa amin,” dagdag pa nito.
Naging malaking motibasyon din para sa 19-anyos at 6-foot-2 middle blocker, unang naglaro para sa Nazareth School of National University sa high school division, ang pressure na nakaatang sa kanya bilang baguhan at gusto rin ni Gagate na makatulong siya sa net defense ng Lady Spikers.
- Latest
