FEU teams dinalawahan ang UE
MANILA, Philippines – Tatlong sets lamang ang kinailangan ng Far Eastern University Lady Tamaraws para magarbong buksan ang unang araw ng UAAP season 82 women’s volleyball tournament nang pahiyain ang University of the East Lady Warriors, 25-8, 25-20, 25-17, kahapon sa Mall of Asia Arena sa Pasay City.
Nag-init ang senior middle blocker na si Jeanette Villareal matapos banderahan ang koponan sa likod ng kanyang 11 points mula sa 8 attacks, 2 blocks at 1 ace, habang may 10 markers si sophomore hitter Ivana Agudo.
Nakatuwang din ng tropa si Lycha Ebon na nagrehistro ng 9 points at si main setter Gel Cayuna ay may 9 markers at 18 excellent sets para tapusin ang laro sa loob lamang ng isang oras at siyam na minuto.
“Thankful ako sa mga players ko kasi ang instruction ko sa kanila ay umpisahan natin ng maganda at tatapusin natin ng maganda,” sabi ni coach George Pascua sa kanyang Lady Tamaraws.
Naramdaman kaagad ang tikas ng Season 80 runner-up nang kontrolin ang first set sa 16-4 bentahe at palobohin ito sa 24-8 patungo sa second set at sa kanilang panalo.
Nagwagi rin ang Tamaraws sa Red Warriors, 25-10, 25-22, 25-23, sa men’s divison.
Tumipa si JJ Javelona 11 points para sa panalo ng Tamaraws.
- Latest