San Juan vs Pasay; Pampanga vs Bataan sa quarterfinals
MANILA, Philippines — Didribol ang quarterfinal round ng Chooks-to-Go MPBL Lakan Season ngayon tampok ang doubleheader sa bakbakan ng Pampanga at Bataan at ang salpukan ng Pasay at San Juan sa FilOil Flying V Arena sa San Juan.
Magtatagpo ang Pampanga Giant Lanterns at Bataan Risers sa alas-6:30 ng gabi kasunod ang upa-kan ng San Juan Knights at Pasay Voyagers sa alas-8:30 ng gabi.
Paborito ang Knights, ang MPBL Datu Cup champions at Giant Lanterns na manalo sa kanilang mga lower-ranked opponents.
Ang Knights ang No. 1 team sa North division eliminations sa itinalang 26-4 record para makuha ang homecourt edge laban sa Voyagers, ang No. 8 squad na nagposte ng 17-13 slate.
Walong laro naman ang naipanalo ng Giant Lanterns para maitarak ang 21-9 baraha at kunin ang No. 4 spot sa eliminations kasama ang homecourt advantage kontra sa Risers, may 20-10 marka at No. 5 sa 16-team North division.
Sina John Wilson, Mike Ayonayon at Jhonard Clarito ang muling gagabay sa Go for Gold-backed Knights na kinuha ang 74-72 panalo laban sa Voyagers, sasandig kina Axel Inigo at Jaypee Belencion.
Muling pangungunahan nina Larry Muyang, Mark Cruz, Michael Juico at Levi Hernandez ang Giant Lanterns, gustong makabawi sa kanilang 76-78 kabiguan sa Risers na ipaparada naman sina Bryon Villarias, Ryan Batino at Gino Jumao-As.
- Latest
