Isa pang gold sa Team Sibol
MANILA, Philippines – Humirit pa si Team Sibol standout Caviar Napoleon Acampado ng gintong medalya sa Starcraft II kahapon sa 2019 Southeast Asian Games esports competition sa The Arena sa San Juan City.
Hindi nakaporma sa tikas ni Acampado si Thomas Kopankiewicz ng Singapore matapos isalpak ang 4-1 paglampaso tungo sa matamis na pagsikwat sa gintong medalya.
Nahablot ni Acampado ang 2-0 maagang bentahe sa best-of-seven finals na siyang naging matibay na pundasyon nito para pigilan ang Singaporean player.
“I’m so happy because all the pressure that I felt for a year is gone now. It (Game 3 loss) was more on my fault so I thought I just needed to regain my focus,” ani Acampado na kampeon sa 2018 World Electronic Sports Games.
Pinataob ni Acampado si Tran “MeomaikA” Hong Phuc ng Vietnam, 3-2 para makapasok sa championship round.
Ito ang ikatlong gintong medalya ng Team Sibol na suportado ni businessman Manny V. Pangilinan sa biennial meet.
Una nang nagkampeon ang Team Sibol sa Mobile Legends: Bang Bang (MLBB) at Dota 2.
Tinalo ng Team Sibol ang Indonesia, 3-2 sa MLBB habang nanaig naman ang Pinoy games sa Thailand, 3-2 para makuha ang ginto sa Sibol Dota 2.
Tumataginting na P1 milyon ang pabuyang ibibigay ng Smart/PLDT para sa individual gold medallist sa esports habang may P2 milyon naman ang mga nagwagi ng ginto sa team event.
- Latest
