9 events bubuksan sa Manila cluster

MANILA, Philippines — Umpisa na ang aksyon ngayon sa siyam sa kabuuang 27 sports events na idinaraos sa Metro Manila kabilang na ang limang events sa historic Rizal Memorial Sports Complex sa Malate, Manila.

Pangungunahan nina Reyland Capellan, Ace De Leon, Jan Timbang at John Vergara ang Philippine gymnastics na magpasiklab sa men’s qualification at all-around event ng men’s gymnastics artistics event simula sa alas-2 ng hapon na gaganapin sa Rizal Memorial Coliseum sa loob ng RMSC complex sa Manila.

Bukod sa gymnastics, lalarga na rin ang wieghlifting competition kung saan susubukan nina John Fabliar Ceniza (55-kg) at Mary Flor Diaz (45-kg) na sungkitin ang ginto sa kanilang magkahiwalay na event sa Ninoy Aquino Stadium.

Sisimulan na rin ang kampanya nina Francis Casey Alcantara, Treat Huey, Jason Pantrombon, Ruben Gonzales Jr.  at Alberto Lim Jr.  sa first round ng men’s singles preliminary habang sina Ma-rian Capadocia, Dinise Dy, Clarice Patrimonio, Khim Iglupas at Shaira Rivera sa women’s first round singles preliminary sa bagong RMSC tennis center.

Mag-uumpisa na rin ang aksyon sa wushu sa Hall A and B sa loob ng World Trade Center sa Pasay City.

Tiyak ang magandang ipapakita nina Jessie Aligaga, Johnzenth Gajo, Jones Inzo, Arnel Manda, Fred Padua, Da-niel Parantac at sina Wally Divine at Agatha Wong sa men and women’s Taolu Taijiquan event sa alas-9 ng umaga at sa men’s Taolu Changquan sa alas-10:40 ng umaga.

Malakas din ang loob nina Chris Newsome, CJ Perez, Jason Perkins at Moa Tautuaa sa paghaharap kontra sa Indonesia sa alas-12 ng tanghali sa men’s 3x3 basketball event na gagawin sa FilOil Flyng V Arena simula ngayong araw.

Tiwala rin sina Jack Animam, Afril Bernardino, Clare Castro at Janine Pontijos na malampasan ang hamon ng  Myanmar sa kanilang unang laro sa women’s 3x3 sa alas-10:40 ng umaga sa parehong venue.

Puputok din ang shooting competition ngayon sa Marine Corps Training Center sa Taguig City, badminton sa Muntinlupa City Sports Complex, squash sa Manila Polo Club sa Makati at Ice Hockey sa SM MOA Ice Rink.