Alaska ite-trade si Banchero sa Magnolia
MANILA, Philippines — Patuloy ang pagbalasa ng Alaska sa kanilang roster sa misyong maisalba ang kampanya sa 2019 PBA Governors’ Cup.
Ito ay matapos nilang pakawalan si point guard Chris Banchero sa Magnolia kapalit ni forward Robbie Herndon at big man Rodney Brondial kahapon sa kalagitnaan ng PBA break.
Subalit dahil nasa break ang pro-league ay inaasahang bukas pa opisyal na maipapasa ng dalawang koponan ang trade papers sa Commissioner’s Office na rerebyuhin ng five-man trade committee.
Kung sakaling matuloy ang palitan ay magwawakas ang limang taong pagsasama nina Banchero at ng Alaska simula nang kunin siya bilang fifth overall pick noong 2014 PBA Rookie Draft.
Dating standout ng US NCAA at ASEAN Basketball League ang Fil-Italian at simula nang pumasok sa PBA ay naging isa sa pinakamagaling na playmaker sa liga.
Sa kabilang banda, ang Alaska kung sakali ang magiging ikatlong team ni Herndon simula nang mapili noong 2017 draft bilang sixth pick ng Globalport (NorthPort).
Maglalaro naman ang dating Adamson standout na si Brondial sa kanyang ikaapat na koponan nang mapili bilang 6th pick ng Ginebra noong 2014 din at naglaro na rin sa Barako Bull.
Kung mapaplantsa at maaprubahan din ang pinakabagong trade sa umiinit na season-ending conference ay ito na ang magiging ikatlong transaksyon ng Aces sa ilalim ni bagong coach Jeff Cariaso.
Nauna na nilang dinala si defensive guard Ping Exciminiano at isang future draft pick sa Rain or Shine kapalit si Maverick Ahanmisi bago magsimula ang PBA Governor’s Cup.
Nasundan ito ng pagpakawala ng Alaska kay Carl Bryan Cruz kapalit si forward Abu Tratter sa Blackwater.
- Latest