Iran, Nigeria pasok sa 2020 Olympics

CHINA -- Nagbulsa ng tiket sa 2020 Olympic Games ang Nigeria at Iran habang nadiskaril naman ang layunin ng host China sa 2019 FIBA World Cup.

Inangkin ng Nigeria ang nasabing silya na mapupunta sa top African finisher sa World Cup matapos talunin ang China, 86-73 para sa kanilang ikatlong sunod na Olympic trip.

“Right now, we kind of feel like it’s the golden age of Nigerian basketball,” wika ni Ike Dio-gu, isa sa limang NBA players na nasa World Cup roster ng Nigeria.

Ang nasabing panalo ng Nigeria ang dumiskaril sa hangarin ng China na makuha ang karapatang maglaro sa 2020 Olympics na ibibigay sa top Asian finisher. Dahil dito ay nasikwat ng Iran ang nasabing posisyon makarang gibain ang Gilas Pilipinas, 95-75.

Kailangan ng China na sumabak sa qualifying tournament kagaya ng Pilipinas para sa tsansang makapasok sa 2020 Olympics na gagawin sa Tokyo, Japan.

“Unbelievable,” wika ni Iran forward Michael Rostampour sa kanilang paglalaro sa nasabing quadrennial event. “The highs and lows of this World Cup are just ridiculous. ... This is a great day to be an Iranian.”

Samantala, tinalo naman ng Spain ang Serbia, 81-69 sa duwelo ng dalawang koponang kapwa may 4-0 records.

Lalabanan ng Serbia ang unbeaten Argentina sa quarterfinals sa Dongguan, China.

Sasagupain naman ng Spain ang Poland, natalo sa Argentina, 65-91, sa Shanghai para sa kanilang quarterfinal game.