PLDT inihulog ang F2 sa ikalawang kabiguan
MANILA, Philippines — Pinalo ng PLDT Home Fibr Power Hitters ang ikalawang sunod na panalo matapos padapain ang F2 Logistics Cargo Movers, 25-21, 26-28, 15-25, 25-19, 15-11, sa Philippine Superliga All-Filipino Conference kahapon sa Corpus Christi Gymnasium sa Cagayan de Oro City.
Nagtala si Gretchel Soltones ng 21 puntos mula sa 19 attacks at dalawang aces katuwang si Jerilli Malabanan na naging ‘spark plug’ ng tropa sa deciding set sa kanyang 21 marka.
Naramdaman din ang presensya nina veteran middle blocker Gen Casugod at skipper Aiko Urdas na tumapos na may 7 at 10 points, ayon sa pagkakasunod.
“Tuwang-tuwa ako sa laro nilang lahat. Si Jerrili lalo na sa dulo. Masaya ako para sa team namin. Puwede naman pala eh, bakit ngayon na lang. Sana noon pa. Pero sige mayroon pa namang chance eh” sabi ni head coach Roger Gorayeb. “Natutuwa naman ako papunta ako sa crossover na maganda laro namin.”
Sa unang set ay nagpakitang-gilas na ang dalawang tropa pero nagawang manggulat ng Power Hitters nang manakaw ang first set bago nakabawi ang Cargo Movers sa extended second set para itabla sa 1-1 ang laban, 28-26.
Pansamantalang naantala ang laro dahil sa sobrang init sa loob ng venue matapos magkaproblema ang air-conditioning system nito.
Umabot din ng 30 minuto bago muling bumalik sa ayos ang aircon sa venue at itinuloy ang laro.
Pagkabalik ng laro ay agad umalagwa ang Cargo Movers para tambakan ang Power Hitters at iposte ang 22-12 bentahe sa third set.
Pero nakasagot sa fourth set ang PLDT sa likod ni Soltones para ipuwersa ang laro sa deciding set.
Naulit ang bangungot ng F2 Logistics sa huling laro nito kontra sa Petron sa fifth set kung saan umararo ang PLDT para sa 13-9 bentahe bago ito tinapos ni Soltones. Fergus E. Josue, Jr.
- Latest