Gilas magsasanay sa Spain
MANILA, Philippines — Lilipad ngayon patungong Spain ang Gilas Pilipinas para ipagpatuloy ang training camp at makilahok sa isang mini-pocket tournament tatlong linggo bago ang kampanya sa 2019 FIBA World Cup.
Inaasahang makakasama ang 14 sa 19-man pool ni head coach Yeng Guiao sa Spain kung saan makakasagupa nila ang home team, Congo at Ivory Coast sa training camp na aarangkada hanggang Agosto 11.
Mangugunguna sa Gilas delegation sina naturalized player Andray Blatche, JP Erram, Paul Lee, Mark Barroca, Matthew Wright, Kiefer Ravena at rookies Robert Bolick at CJ Perez.
Dahil sibak na kontensyon ng 2019 PBA Commissioner’s Cup ang Ginebra at Rain or Shine matapos matalo sa semifinals ay makakasama rin sa Spain trip ng Gilas sina Japeth Aguilar ng Gin Kings at Gabe Norwood at Beau Belga ng Elasto Painters.
Bunsod naman ng pagpasok ng TNT Katropa at San Miguel sa championship ng mid-season conference ay hindi makakasama sa byahe sina Roger Pogoy at Troy Rosario ng Tropang Texters at sina Christian Standhardinger, June Mar Fajardo at Marcio Lassiter (injured) ng Beermen.
Sa Madrid ang unang destinasyon ng Nationals subalit didiretso sila sa Guadalajara para sa back-to-back tune-up games kontra sa Ivory Coast at Congo.
Matapos iyon ay tutungo sila sa Malaga para sa opisyal na pocket tournament kontra sa Congo.
Kung mananalo ay aabante ang Gilas sa isa pang laban kontra sa mananalo sa pagitan ng Ivory Coast at Spain.
- Latest