Himalang panalo ng CEU Scorpions

MANILA, Philippines — Muling umiskor ng himalang panalo ang kulang-kulang na Centro Escolar University matapos silatin ang paboritong Cignal-Ateneo, 77-74, sa Game 2 ng 2019 PBA D-League best-of-five Finals series kahapon sa Ynares Sports Arena sa Pasig City.

Bumida para sa Scorpions si Jerome Santos na nagpakilala sa 28 puntos at 10 rebounds kabilang na ang walong markers sa huling kanto kung saang tuluyang lumayo ang koponan bago apulahin ang hu-ling pag-aalsa ng Blue Eagles tungo sa tagumpay.

Umalalay sa kanya si Maodo Malick Diouf na may 23 puntos, 16 rebounds, apat na assists at dalawang supalpal habang may 13 puntos, two assists at two blocks din ang kapitan na si Rich Guinitaran.

“We’re able to redeem ourselves. We’re able to show a championship game. You just have to hand it to the boys. They fought for this game,” ani head coach Derick Pumaren na naitabla na ang serye sa 1-1 matapos ang kalimut-limot na 101-66 kabiguan sa Game 1. “We have to keep that motivation from within. I’ve just said that they have to believe in themselves, that they can compete against Ateneo. I just wanted that fire and the competiveness in them. We showed it this game.”

Sa kagustuhan naman ng Ateneo na makasikwat na ng 2-0 abante, rumatsada ito sa likod nina Ange Kouame, SJ Belangel at Adrian Wong ng 19-10 run upang makalapit sa 74-75, 22 segundo pa sa orasan.

Sa kabutihang palad para sa CEU, natawagan ng traveling si Thirdy Ravena sa huling 15 segundo na sinulit naman ni France Diaz na nagsukbit ng dalawang free throws upang masiguro ang panalo, 77-74.

May tsansa pa sana ang Blue Eagles na makapuwersa ng overtime subalit sablay ang dalawang tres nina Belangal at Wong sa final buzzer.