Aces diretso sa tatlong sunod
MANILA, Philippines — Hindi man impresibo ang kanilang import ay naidiretso pa rin ng Alaska ang kanilang ratsada sa tatlo.
Nagsalpak sina Chris Banchero at Simon Enciso ng magkasunod na drive sa huling dalawang minuto ng final canto para tulungan ang Aces na makatakas laban sa Meralco Bolts, 93-89, sa 2019 PBA Commissioner’s Cup kahapon sa Ynares Center sa Antipolo City.
“We’re going in the right direction right now. We wanna continue to play well and we have tough teams to play,” ani Banchero na tumapos na may 23 points, 9 rebounds at 4 assists para sa 4-2 record ng Alaska.
Nabigo ang Meralco sa hangad na ikatlong sunod na panalo.
Nagdagdag si Vic Manuel ng 17 markers para sa Aces kasunod ang 12 at 10 points nina import Chris Daniels at Jeron Teng, ayon sa pagkakasunod.
Pinamunuan naman ni reinforcement Gani Lawal ang Bolts mula sa kanyang 27 points, 26 rebounds at 2 assists, habang may 11 markers si guard Baser Amer.
Mula sa dikitang first half, 44-42, ay naitayo ng Alaska ang 13-point lead, 68-55, mula sa drive at dalawang free throws ni Manuel sa huling 2:37 minuto ng third period.
Sa pangunguna ni Lawal ay nagawa ng Meralco na makadikit sa 89-92 agwat sa natitirang 56.8 segundo.
Ang mintis ni Nico Salva sa posesyon ng Bolts ang nagresulta sa split ni Enciso sa huling 24.7 segundo para selyuhan ang panalo ng Aces.
- Latest
