Toronto puro na

OAKLAND, California -- Isang panalo na lang ang kailangan ng Toronto Raptors para sa kanilang kauna-unahang NBA championship.

Ito ay matapos gibain ng Raptors ang two-time defending champions Golden State Warriors, 105-92 sa Game Four ng kanilang title series.

Umiskor si Serge Ibaka ng 20 points mula sa bench para sa 3-1 bentahe ng Toronto laban sa Golden State.

Pipilitin ng Raptors na isara ang kanilang serye ng Warriors sa Game Five sa Lunes (Martes, Manila time) sa Toronto .

Humataw si Kawhi Leonard ng 36 markers mula sa 11-of-22 fieldgoal shooting bukod pa sa hinakot na 12 rebounds para sa ikalawang sunod na panalo ng Toronto laban sa Golden State.

“Just (got to) be patient, come in focused and ready to play defense and make some shots,” sabi ni Leonard. “As long as we win, I’m satisfied.”

Nagdagdag si Pascal Siakam ng 19 points.

Ang inaasahang arangkada ng Warriors sa third quarter ay hindi nangyari at sa halip ay ang Raptors ang rumatsada.

Tumipa si Leonard ng 17 points sa 37-21 third-quarter blast ng Toronto para makawala sa Warriors.

Nagbalik naman sa aksyon si Klay Thompson sa panig ng Warriors matapos hindi maglaro sa Game Three bunga ng strained hamstring at nagtala ng 28 points mula sa 11-of-18 fieldgoal shooting.

Tumipa naman si Stephen Curry ng 27 markers buhat sa malamyang 9-for-22 clip. Kumolekta si Draymond Green ng 10 points, 9 rebounds at 12 assists.

Muling naglaro ang Golden State na wala si playoff scoring leader Kevin Durant, may right calf injury at halos isang buwan nang hindi nakikita sa aksyon.

Ito ang pinakahuling pagkakataon na maglalaro ang Warriors sa Oracle Arena dahil sa kanilang paglipat sa bagong Chase Center sa San Francisco sa susunod na season.

“So we look forward to playing another basketball game in an exciting atmosphere, and the ultimate test,” wika ni Golden State coach Steve Kerr.