Dating import sa UVC nasa Cignal HD Spikers na

MANILA, Philippines – Tumawid ng bakod si Filipino-American setter Alohi Robins-Hardy na dating miyembro ng United Volleyball Club.

Masisilayan sa aksiyon sa pagkakataong ito si Robins-Hardy suot ang Cignal HD Spikers jersey sa pagsisimula ng 2019 Philippine Superliga (PSL) All Filipino Conference sa Hunyo 15.

Mainit namang tinanggap si Robins-Hardy ng HD Spikers.

“Join us as we welcome the newest member of the Cignal HD Spikers Alohi Robins-Hardy. With her wealth of experience and unique skillset, she is sure to bring a new dimension to the HD Spikers in our pursuit for greatness,” ayon sa post ng official Facebook page ng Cignal.

Para kay Cignal head coach Edgar Barroga, malaking tulong ang pagpasok ni Robins-Hardy sa tropa dahil bukod sa kaniyang setting skills, makakatuwang rin ito ng ibang manlalaro sa blocking.

Matangkad si Robins-Hardy na may taas na 6-foot-2.

Makakasama ni Robins-Hardy sa HD Spikers sina Rachel Ann Daquis, My-lene Paat, Mumay Vivas, Jheck Dionela at Janine Navarro.

Unang nasilayan sa aksiyon si Robins-Hardy sa PSL Grand Prix kasama si United VC team captain Kalei Mau.

Umabot lamang sa fifth place ang United VC sa naturang kumperensiya kung saan nagtala si Robins-Hardy ng 24.7 excellent sets kada laro.

Maliban sa pagpasok nito sa kampo ng HD Spikers, magiging bahagi rin si Robins-Hardy ng national team na sasabak sa 2019 Southeast Asian Games na idaraos sa Pilipinas.