Almazan ibibigay ng Rain or Shine sa Meralco
MANILA, Philippines — Maaaring sa darating na 2019 PBA Commissioner’s Cup ay ibang uniporme na ang isuot ni six-year slotman Raymond Almazan.
Ito ay dahil plano siyang dalhin ng Rain or Shine sa Meralco kapalit ng dalawang first-round draft picks sa 2020 at 2021.
Nakita lamang ang 6-foot-9 na si Almazan sa anim na laro ng Elasto Painters sa 2019 PBA Philippine Cup dahil sa kanyang injury.
Nagposte si Almazan, ang No. 3 overall pick noong 2013 PBA Rookie Draft sa likod nina No. 1 Greg Slaughter ng Ginebra at No. 2 Ian Sangalang ng Magnolia, ng mga averages na 8.0 points, 6.0 rebounds at 2.17 blocks per game.
Inaasahang magbibigay ng desisyon si PBA Commissioner Willie Marcial ngayong araw tungkol sa naturang kasunduan ng Rain or Shine at Meralco.
Sakaling aprubahan ang nasabing trade ay makakasama ni Almazan sa bakuran ng Bolts ang dating teammate niya sa Gilas Pilipinas na si Ranidel De Ocampo bukod pa kina Chris Newsome at Cliff Hodge.
Nagkaroon ng sigalot sina Almazan at Elasto Painters’ head coach Caloy Garcia dahil sa hindi pagsipot ng dating sentro ng Letran Knights sa NCAA sa kanilang mga itinakdang ensayo.
- Latest
