Donaire na-KO si Young

MANILA, Philippines — Itinarak ni four-division world champion Nonito ‘The Filipino Flash” Donaire ang impresibong sixth-round knockout win laban kay Stephon Young upang matagumpay na maipagtanggol ang kanyang World Boxing Association (WBA) bantamweight title sa World Boxing Super Series (WBSS) na ginanap sa Cajundome sa Lafa-yette, Louisiana. 

Agad na nagparamdam ng lakas si Donaire para dominahin si Young sa unang tatlong yugto ng laban.

Ngunit isang solidong left hook na tumama sa baba ni Young ang binitawan ni Donaire na nagpabagsak sa kanyang American rival, may 2:45 minuto pang nalalabi sa sixth round para matamis na makuha ang panalo.

“We came in here with a good game plan, but Stephon is a slick fighter so it was tough to come up with a good game plan,” wika ni Donaire na sumulong sa 40-5 rekord tampok ang 26 knockouts.

Orihinal na makakalaban sana ni Donaire si South African Zolani Tete para sa isang bantamweight title unification bout. Subalit nagtamo si Tete ng injury sa kanang balikat dahilan upang palitan ito ni Young.

“One way or another I paid for it with scratches on my right hand, but it paid off. I’ll take the damage to earn the victory,” dagdag ni Donaire.

Dahil sa panalo, umusad si Donaire sa finals ng World Boxing Super Series kung saan makakaharap nito ang mananalo sa pagitan nina WBA Regular bantamweight world champion Naoya Inoue ng Japan at IBF bantamweight world champion Emmanuel Rodriguez ng Puerto Rico.

Nakatakdang magtuos sina Inoue at Rodriguez sa Mayo 18 sa Glasgow, Scotland.