Salang kaagad ang Magnolia

MANILA, Philippines — Isang araw lang ang naging pahinga ng Magnolia para paghandaan ang Rain or Shine sa kanilang best-of-seven semifinals series.

“Sana next week pa ang semis para makapahinga pa kami,” sambit ni coach Chito Victolero matapos ang 85-72 pagpapatalsik ng Hotshots sa Ginebra Gin Kings sa Game Three ng kanilang best-of-three quarterfinals duel noong Miyerkules para itakda ang semis wars nila ng Elasto Painters.

Magtutuos ang Rain or Shine at Magnolia sa Game One ngayong alas-7 ng gabi sa 2019 PBA Philippine Cup sa Smart Araneta Coliseum.

Huling nakita sa aksyon ang Elasto Painters, ang No. 2 team at nagbitbit ng ‘twice-to-beat’ advantage sa quarterfinals, noong Abril 7 kung saan nila sinibak ang No. 7 NorthPort Batang Pier, 91-85.

“If we can limit our turnovers and limit their points, I think we can be able to pull of a win,” wika ni Rain or Shine mentor Caloy Garcia sa tropa ni Victolero.

Nauna nang tinakasan ng Elasto Painters ang Hotshots, 75-74 tampok ang krusyal na three-point play ni two-time PBA MVP James Yap noong Pebrero 13.

“We’re not the most talented team, but in terms of chemistry, I think we’re No. 1,” sabi ni Victolero, muling aasa kina Magnolia guards Paul Lee, Mark Barroca at Jio Jalalon katuwang sina Ian Sangalang, Rafi Reavis at Aldrech Ramos.

Maliban kay Yap, ibabandera naman ng Rain or Shine sina Beau Belga, Gabe Norwood, Mave-rick Ahanmisi at Norbert Torres.

Si Lee ay nanggaling sa bakuran ng Elasto Painters.

“Kahit na sabihin mong same ‘yung ginagawa nila, dahil sa sobrang tagal na nilang magkakasama, alam na nila ‘yung galaw ng isa’t isa,” wika ni Lee, kumamada ng 25 points sa 85-72 panalo ng Magnolia laban sa Ginebra sa Game Three noong Miyerkules, sa istilo ng Rain or Shine.