Cray nakatuon na sa Asian Championships

MANILA, Philippines — Matapos ang matagumpay na pagsabak sa katatapos na  2019 Ayala Philippine Athletics Championships sa Ilagan City, Isabela ay paghahandaan naman ni Fil-Am trackstar Eric Cray ang 23rd Asian Athle-tics Championships.

Ang naturang torneo na nakatakda sa Abril 19-24 sa Doha, Qatar ay isa lamang sa mga planong lahukan ng 30-anyos na si Cray bilang paghahanda sa 30th Southeast Asian Games na pamamahalaan ng bansa sa Nobyembre 30 hanggang Disyembre 11.

Bukod sa Asian Athletics Championships ay inilinya din ng Philippine Amateur Track and Field Association kay Cray at sa iba pang Fil-Am at local athletes ang International Amateur Athletics Federation (IAAF) World Relays at ang IAAF World Championships.

“I’m still on the build up, the SEA Games is far away, the World Championships is far away, the Asian Championships is pretty far away,” sabi ni Cray, ang three-time gold medal winner sa men’s 400-meter hurdles ng SEA Games.

Itinakbo ni Cray, ipinanganak sa Olongapo, ang mga gintong medalya sa men’s 200m hurdles at sa 4x100m relay sa 2019 Ayala Philippine Athle-tics Championships.

Ang IAAF World Relays ay gagawin sa Mayo 12-13 sa Yokohama, Japan, habang ang IAAF World Championships ay sa Setyembre 27 hanggang Oktubre 6 sa Doha, Qatar.