Meralco Bolts lusot sa 2OT
MANILA, Philippines – Hindi sapat ang isang overtime para makuha ng Meralco ang panalo.
Nagsanib-puwersa sina Baser Amer at Chris Newsome para itakas ang Bolts laban sa NorthPort Batang Pier, 126-123 sa 2019 PBA Philippine Cup kahapon sa Smart Araneta Coliseum.
Kumonekta si Amer ng dalawang krusyal na three-point shots sa hu-ling dalawang minuto ng ikalawang overtime para wakasan ang three-game losing skid ng Meralco.
Tumapos si Newsome na may 28 points, 12 rebounds, 7 assists at 4 steals para sa Bolts, nakatabla sa 106-106 matapos iwanan ng Batang Pier sa 100-106 sa huling 30.1 segundo sa fourth period.
Nagwakas sa 113-113 ang iskor sa unang extra period kasunod ang basket ni Ranidel De Ocampo at magkasunod na triples ni Amer para sa 121-113 bentahe ng Meralco sa 2:21 minuto ng ikalawang overtime.
Huling nakadikit ang NorthPort, nalasap ang ikaapat na dikit na kamalasan, sa 123-125 mula sa tirada ni Moala Tautuaa sa natitirang 11.1 segundo.
Hangad naman ng Alaska na manatili sa pagsosolo sa ikatlong silya sa pagharap sa nanganganib na Magnolia ngayong alas-6:45 ng gabi sa Ynares Center sa Antipolo City.
Sa unang laro sa alas-4:30 ng hapon, puntirya ng TNT Katropa ang pang-limang panalo laban sa Blackwater.
- Latest