Fil-foreign athletes tututukan sa Philippine Athletics Open
ILAGAN CITY, Isabela, Philippines — Bukod kay two-time Olympic Games campaigner Eric Cray, inaasa-hang aagaw din ng atensyon sina pole vaulters Natalie Uy at Alyana Nicolas sa paghataw ngayon ng 2019 Philippine Athletics Championship dito sa Ilagan Sports Complex.
Nangako ang parehong 24-anyos na sina Uy, ang ama ay isang Cebuano at Nicolas, isinilang sa Quezon City at kasalukuyang nag-aaral sa California State Northridge, na gagawin ang lahat para makuha ang gold medal sa kanilang event.
“My goal always is to win,” wika ni Uy na may personal best na 4.30 meters na kanyang itinala sa Spain noong nakaraang taon. “My target is to jump around 4.20 meters.”
May personal best namang 3.93m si Nicolas, nanirahan sa United States noong siya ay bata pa mula sa Pagsanjan, Laguna kung saan siya lumaki.
“I feel great and excited to compete here,” ani Nicolas. “I’ve been training really hard so I’m really looking forward to my outcome for this meet.”
Ang 30-anyos na si Cray, tatakbo sa 200-meter at 4x100m relay events, ang mangunguna sa kampanya ng Team Philippines sa nasabing athletics meet na gagamitin ng Philippine Amateur Track and Field Association bilang preparasyon sa 2019 Asian trackfest sa Abril at sa 2019 SEA Games sa Nobyembre.
“I’m here to shake my legs. My ultimate goal is the SEA Games,” sabi ni Cray, kasalukuyang hawak ang Philippine national record para sa 400m hurdles at 100m run.
Bukod kina Cray, Uy at Nicolas, ang iba pang magsusuot ng uniporme ng Philippine team ay sina Fil-Ams Donovant Arriola Grant, Lily Carter, William Morrison, ang kambal na sina Kayla at Kyla Robinson at Kristina Knott.
Si pole vaulter EJ Obiena ang mangunguna naman sa mga local athletes na kinabibilangan nina Harry Diones at Marco Vilog.
Makakasukatan ng pambansang koponan ang mga pambato ng Thailand, United Arab Emirates, Jordan, Hong Kong, Sri Lanka, India, Mongolia at Chinese-Taipei.
- Latest
