Win. No. 7 target ng SMB-Alab

MANILA, Philippines — Target ng nagdepensang San Miguel-Alab Pilipinas ang pang-pitong panalo sa pakikipagtagpo sa Macau Black Bears ngayon sa pagpapatuloy ng 9th Asean Basketball League (ABL) sa FilOil Flying V Center sa San Juan City.

Ang Alab Pilipinas ay hindi pa natatalo sa kanilang home court sa limang laro (5-0) at 1-2 sa road game, ang huli nilang talo ay sa mga kamay ng Formosa Dreamers, 72-73 noong Linggo lamang at ang una ay sa Wesports Malysia Dragons, 71-72 noong Enero 9.

Kaya hangad ng tropa ni coach Jimmy Alapag na bumangon agad para mapanatili ang tiwala ng buong koponan tungo sa asam na back-to-back titles.

Itataya rin ng Alab Pilipinas ang hawak na solo liderato sa 6-2 win-loss kartada dahil kung matatalo sila sa Black Bears sa alas-8 ng gabi ay maaari silang  bumagsak sa sosyohan sa top spot kung magwawagi rin ang Westports Malaysia (5-3) laban sa Saigon Heat bukas.

Ang Black Bears ay galing sa dalawang sunod na talo, ang una ay sa CLS Knights-Indonesia, 78-105, noong Enero 13 at sa Hong Kong Eastern, 90-114, noong Miyerkules sa University of Macau Gym.

Pagkatapos sa laro kontra sa Black Bears, haharapin naman ng Alab Pilipinas ang Mono Vampire-Thailand sa Linggo sa Sta. Rosa Multi-Purpose Complex na magpapaalala sa kanilang Finals showdown noong nakaraang taon.

Sasandal si coach Alapag kina Puerto Rican imports na sina Renaldo Balkman at PJ Ramos at back-to-back MVP Bobby Ray Parks Jr. Aasahan din sina 6’2 Fil-Am guard Ethan Alvano, 6’7 Brandon Rosser, kapatid ni Matt Ganuelas-Rosser ng SMB, 6’5 forward Caelan Tiongson, Thomas Torres at Prince Rivero.

 Muli ring hahataw ang mga beteranong sina Josh Urbiztondo, Chris Sumalinog, Nico Javelona, Ray Alabanza at Lawrence Domingo.