San Beda wala pa ring talo
MANILA, Philippines – Inilabas ng San Beda University ang bangis nito sa huling sandali ng laro upang kubrahin ang 17-25, 25-13, 25-9, 21-25, 15-11 panalo laban sa Jose Rizal University para manatiling malinis ang kanilang record sa NCAA Season 94 women’s volleyball tournament sa The Arena sa San Juan City.
Halimaw sina Maria Nieza Viray at Cesca Racraquin para buhatin ang Lady Red Spikers sa ikalimang sunod na panalo at mapatatag ang kapit sa liderato.
Kumana si Viray ng 26 puntos na nabuo nito sa 23 attacks, dalawang blocks at isang ace, habang mala-MVP performance naman ang inilatag ni Racraquin na naglista ng 18 attacks, anim na aces, isang block at 22 digs.
Nagdagdag naman sina Jiezela Viray, Satrianni Espiritu at Trisha Paras ng pinagsama-samang 24 puntos habang may 35 excellent sets si Lynne Matias, at 31 digs at 23 receptions si libero Daryl Racraquin para sa San Beda.
Lumasap ang Lady Bombers ng ikatlong kabiguan para mahulog sa 2-3 marka.
Nagpakawala ang San Beda ng kabuuang 60 hits – lamang ng 20 kills sa 40 na nakuha ng Jose Rizal.
Sa men’s division, nanaig ang Jose Rizal sa San Beda sa iskor na 20-25,25-19, 25-22, 28-26, para sumulong sa 2-3 baraha.
Bagsak naman sa 1-4 ang Red Lions.
Sa ikalawang laro, namayani ang nagdedepensang Arellano University sa Lyceum of the Philippines, 25-19, 25-20, 25-17, para saluhan ang San Beda sa unahan ng standings tangan ang parehong 5-0 marka.
Nahulog ang Lyceum sa 1-5 baraha.
- Latest