Red Lions, Pirates hangad ang ‘twice-to-beat’ bonus
MANILA, Philippines — Tangka ng nagdedepensang San Beda at Lyceum na angkinin ang dalawang ‘twice-to-beat’ incentives sa semifinal round sa magkahiwalay na laban sa 94th NCAA men’s basketball tournament sa FilOil Flying V Center sa San Juan City.
Haharapin ng Red Lions ang Arellano Chiefs ngayong alas-4 ng hapon matapos ang laro ng Pirates at St. Benilde Blazers sa alas-2.
Kung magwawagi ang Red Lions at ang Pirates ay tuluyan nilang makukuha ang dalawang ‘twice-to-beat’ incentive sa Final Four kung saan kailangang talunin sila ng dalawang beses sa magkahiwalay na semis matches.
“The initial goal is to make the Final Four, which we achieved. The next step is the twice-to-beat advantage, which we are now hoping to get,” sabi ni San Beda coach Boyet Fernandez.
Mataas ang kumpiyansa ng Red Lions dahil galing sila sa 77-55 panalo laban sa Blazers noong Huwebes sa pangunguna ni Robert Bolick na humataw ng 19 puntos.
Ngunit sinabi ni Fernandez na hindi nila binabalewala ang kakayahan ng Chiefs kahit na sibak na sa torneo ang Arellano.
“They have nothing to lose,” sambit ni Fernandez.
Sa iba pang laro, hangad naman ng Pirates na bumangon agad mula sa kanilang 79-80 pagkatalo sa Letran Knights noong Biyernes.
Makakaharap ng Pirates ang Blazers na nasa ‘must win’ situation din dahil sa kanilang 8-7 slate.
Kung matatalo pa ang St. Benilde ni coach TY Tang sa Lyceum ay matatapos na rin ang kanilang pag-asang makapasok sa semis.
Dahil dito ay mabibigyan ng ‘free ride” ang Perpetual Help Altas sa Final Four.
- Latest