PSC kumpiyansang makakamit ng bansa ang overall championship sa 2019 SEA Games

MANILA, Philippines – Nagpahayag ng ma­la­king pagtitiwala si Philippine Sports Commission chairman William “Butch” Ra­­mirez sa ka­ka­yahan ng mga Pinoy ath­letes sa pagpitas mu­li sa overall title sa darating na 30th Southeast Asian Games na gaganapin dito sa bansa sa susunod na ta­on.

Sinabi kahapon ni Ra­mirez na kung hindi pa magkampeon ang Pilipinas sa 2019 SEA Games, hindi na lamang nito itu­tuloy ang ikaapat na hos­ting ng bansa sa nasabing biennial games.

“I have faith in our ath­letes ang our capabi­lity to win the SEA Games. We did it before, so there is no reason why, we can’t win the overall championship again. Ba­kit pa tayo mag-host kung hindi naman tayo mag-champion,” sabi ni Ramirez sa press confe­rence sa PSC conference hall.

Kung matatandaan ay unang nakamit ng ban­sa ang overall championship sa isinagawang SEA Games dito noong 2005.

Sa hindi sinasad­yang pagkakataon ay si Ra­mi­rez din ang chairman ng PSC sa panahong iyon sa ila­lim ng administrasyon ni dating Pangulong Gloria Ma­capagal-Arroyo.

Ang unang hosting ng bansa sa SEA Games ay no­­ong 1981 kung saan tu­mapos ang Pilipinas sa third overall sa hinakot na 55-55-77 gold-silver-bronze me­­dals sa likuran ng In­donesia (85-73-56) at Thailand (62-45-41).

Sa ikalawang hosting noong 1991 ay puma­nga­la­wa naman ang mga Pinoy athletes sa hinakot na ka­­­buuang 91-62-86 gold-silver-bronze medals sa li­­kuran ng overall  champion na Indonesia na na­ka­li­kom ng 92-86-67 medalya.

Ngunit sa ikatlong hosting noong 2005 ay tuluyan nang inangkin na ng Pilipinas ang overall crown sa ka­buuang 112-85-93, ha­bang pumangalawa naman ang Thai­land sa 87-79-117 medalya.

“We are familiar with the SEA Games. We have been there several times already. We know, we can win the overall crown. I am a believer of our athletes capability,” dagdag ni Ramirez.

Sa unang pagtatagpo nina Ramirez, 2019 SEA Games Organizing Committee chairman at Department of Foreign Affairs Secretary Alan Peter Caye­tano at Philip­pine Olympic Committee president Ricky Var­gas ay itinakda ang SEA Games simula sa Nobyembre 29 hangang sa unang linggo ng Dis­yembre sa susunod na taon sa New Clark City sa Tarlac na siyang magiging main hub ng mga nakalatag na sports events.