Nietes, Palicte papagitna sa Superfly 3 sa Sept. 8

MANILA, Philippines — Bukod sa mga biga-ting dating world boxing champions ay papagitna rin ang bakbakan nina Filipino world three-division champion Donnie ‘Ahas’ Nietes at kababayang si ‘Mighty’ Aston Palicte sa “Superfly 3” sa Setyembre 8 sa The Forum sa Inglewood, California.

Paglalabanan ng 36-anyos na si Nietes (41-1-4, 23 KOs) at ng 27-anyos na si Palicte (24-2-0, 20 KOs) ang bakanteng World Boxing Organization super flyweight crown.

Hindi pa natatalo si Nie-tes (41-1-4, 23 KOs) sapul noong 2004 at umiskor ng isang seventh-round KO win laban kay dating world titlist Juan Carlos Reveco sa “Superfly 2”.

“That’s definitely one of the fights we want to have on Superfly 3,” sabi ni promoter Tom Loeffler. “Donnie had a great win on Superfly 2 so it makes sense to bring him back.”

Target ng tubong Murcia, Negros Occidental ang kanyang ikaapat na world boxing crown matapos maghari sa strawweight, light flyweight at flyweight divisions.

Ito naman ang unang pagtatangka ng pambato ng Bago City na si Palicte para sa isang world boxing crown.

Ang mananalo kina Nietes at Palicte ay ang magiging ikaapat na Filipino na lehitimong kampeon matapos sina WBO welterweight champion Manny Pacquiao, IBF super flyweight titlist Jerwin Ancajas at WBO minimumweight king Vic Saludar.

Sina WBA featherweight Jhack Tepora at WBA bantamweight Reymart Gaballo ay mga interim titlists naman ng kanilang mga weight classes.

Ang WBO super flyweight title ay binitawan ni Japanese star Naoya Inoue para umakyat ng weight class.