Bumangon mula sa hukay ang Petro Gazz Angels

MANILA, Philippines — Comeback is real para sa Petro Gazz nang kubrahin nito ang 15-25, 18-25, 25-18, 25-20, 15-9 come-from-behind win laban sa BanKo Perlas Spikers upang masungkit ang kanilang unang panalo sa 2018 Premier Volleyball League Reinforced Conference kahapon sa Batangas City Sports Coliseum sa Batangas.

Ibinuhos ni Ukrainian import Anastasia Trach ang buong puwersa nito para makalikom ng 27 puntos kasama ang 23 attacks kabilang ang game-winning cross-court hit para pamunuan ang Gazz Angels na tuldukan ang kanilang three-game losing skid.

Nakabaon sa 0-2 ang Petro Gazz sa pagtatapos ng second set.

Subalit hindi agad ito nawalan ng pag-asa makaraang pamunuan nina Trach at Estonian reinforcement Kadi Kullerkann ang pagbabalik ng tropa para sa 13-2 kalamangan sa third set.

Naipagpatuloy ng Gazz Angels ang magandang momento sa ikaapat na kanto para maitabla ang laban sa 2-2.

Sa fifth set, matayog ang lipad ng Gazz Angels nang agad nitong ipako ang 11-6 kalamangan na naging matibay na bentahe ng grupo para makumpleto ang paggulantang sa Perlas Spikers.

Bumira si Kullerkann ng 16 puntos habang maganda ang suporta nina middle hitter Cherry Nu-nag na pumalo ng 14 hits at open spiker Wensh Tiu na nagdagdag naman ng 10 marks para sa Petro Gazz.

Nawalan ng ning-ning ang Perlas Spikers na bumagsak sa parehong 1-3 baraha.

Sa men’s division, nagsanib-puwersa sina Mark Alfafara at John Vic De Guzman sa paghataw ng pinagsamang 50 puntos para tulungan ang PLDT na kunin ang 25-20, 26-24, 26-28, 25-23 panalo kontra Cignal.

Sumulong sa 1-2 ang Ultrafast Hitters habang lumagapak sa 1-1 ang HD Spikers.