Navarra inangkin ang Stage 10; Ronda crown amoy na ni Oranza
CALACA, Batangas -- Pumangatlo si Ronald Oranza ng Navy-Standard Insurance sa 147.8-kilometer Stage 10 na inangkin ni teammate Junrey Navara para lumapit sa pormal na paghahari sa LBC Ronda Pilipinas 2018 na inihahandog ng LBC.
Inungusan ng 25-anyos na si Oranza ang 13 pang karibal sa bakbakan sa finish line para pitasin ang third place sa karerang sinimulan sa Tagaytay Convention Center at tinapos dito sa Calaca Municipal Hall.
Nagsumite si Oranza ng bilis na tatlong oras, 26 minuto at dalawang segundo.
Ipinoste naman ng 26-anyos na si Navara ang oras na 3:21:47 para ibulsa ang una niyang lap victory kasunod si Butch Ryan Cayubit (3:21:48) ng Go for Gold.
Ito naman ang pang-pitong podium finish ni Oranza na tinampukan ng kanyang paghahari sa Stage One Vigan criterium, Vigan-Pagudpud Stage Two at Tarlac Stage Seven criterium.
Matapos ang 10 stages kasunod ang dalawang natitirang yugto ay napasakamay na ng tubong Villasis, Pangasinan ang kauna-unahan niyang Ronda crown.
Nagtala si Oranza ng aggregate time na 30:15:03 sa itaas ni teammate at back-to-back title-holder Jan Paul Morales (30:21:58).
“Tapusin muna natin ‘yung huling dalawang stage bago tayo mag-celebrate,” ani Oranza.
Ang tinutukoy ni Oranza ay ang bibitawang 92.72km Calaca-Calaca Stage 11 ngayong umaga na susundan ng Stage 12 criterium bukas sa Filinvest, Alabang.
Nasa No. 3 si George Oconer (30:35:18) ng Go for Gold kasunod sina No. 4 Jhon Mark Camingao (30:36:11) ng Navy, No. 5 Navarra (30:36:11), No. 6 Cris Joven (30:38:24) ng Army-Bicycology, No. 7 El Joshua Carino (30:42:23) ng Navy, No. 8 Jay Lampawog (30:45:06) ng Go for Gold Developmental team at No. 9 Rudy Roque (30:46:55).
- Latest