Lady Stags wala pa ring talo

MANILA, Philippines - Hindi napigilan ang pananalasa ng San Sebastian College-Recoletos Lady Stags nang tuluyan nilang wasakin ang pag-asa ng Lyceum of the Philippines Lady Pirates, 25-21, 25-19, 25-17 kahapon para pa-lakasin ang tsansang walisin ang elimination round ng 92nd NCAA women’s volleyball tournament na ginanap sa FilOil Flying V Arena sa San Juan City.

Humataw sina back-to-back MVP  Grethcel Soltones at Joyce Sta. Rita ng tig-13 puntos para sa ikawalong sunod na panalo ng Recto-based team at  tuluyang ilaglag na ang Lady Pirates sa 5-4 win-loss slate.

Haharapin ng tropa ni coach Roger Gorayeb ang defending champion St. Benilde Blazers bukas sa huling araw ng elimination para kumpletuhin ang bihirang sweep para dumiretso sa Finals tangan ang thrice-to-beat advantage.  Kapag nangyari ito,  magi-ging stepladder contest ang semifinal round.

Asam ni Gorayeb na ma-sweep ang elims para bumawi sa kanilang kabiguan noong nakaraang taon kung saan tinalo sila ng St. Benilde Blazers sa best-of-three Final series.

“Very critical ‘yung ka-diagonal ni Grethcel (Soltones). Kasi kapag hindi gumana, magkakaroon ng malaking problema katulad last year,” ani Gorayeb.

Bukod kay Soltones at Sta. Rita, umani rin ng siyam na puntos si Katherine Villegas at tinutukan naman ni Alyssa Eroa ang depensa sa kanyang 20 digs at 18 excellent  receptions.

Sa iba pang laro, nagwagi ang Letran Lady Knights sa Emilio Aguinaldo College Lady Generals, 18-25, 25-22, 25-23, 24-26, 15-7 para tapusin ang kanilang elimination round assignments sa 2-7 record.

Ang Lady Generals ay 1-8 sa final standings.

Bumawi naman ang EAC Generals sa pamamagitan ng 32-30, 25-22, 25-20 win sa Letran Knights upang itali ang kanilang unang panalo sa siyam na laro habang  2-7 naman ang EAC.

Sa juniors division, nanalo ang EAC Brigadiers sa Letran Squires, 25-16, 25-15, 25-16 para ilista ang kanilang ika-pitong panalo sa walong laro.