CEBU, Philippines — Pakatok ug tumang kalingawan ang gihatod sa lumad nga taga-Mandaue nga si Christian Ceniza o mas naila sa kadaghanan ilabi na sa social media isip Baby Dragon.
Si Baby Dragon naila tungod sa iyang mga nagkadaiyang mga binuang ug pakalog nga iyang gipakita sa iyang followers sa social media ilabi na sa Facebook.
“Dugay nako nga member sauna sa Facebook ug dili pa ko hilig og himo og videos kay dili pa man na uso sauna ang mga vlog-vlog mga etz. So, akong mga post before is in a text form, murag ang mga oat (tawo) ba kay nakabantay sila nga kataw-anan akong mga posts. Pero wala siya’y video, puro text lang gyud siya sa Facebook wall. Wallpaper ang show”, pagsaysay pa ni Baby Dragon atol sa pagpakighinabi niya sa Banat News Hugyaw.
Si Baby Dragon mibutyag nga nabansagan siya sa maong pangalan gumikan kay naggikan kini sa salida nga ‘How To Train Your Dragon’.
“Usa sab nganong nahimo ko nga dragon kay lain sab kaayo og baby pig ug usa sab, pirmi man ko nga nagbugwak og aso tungod sa akong pagpanigarilyo kaniadto”, suma pa niya.
Ang 27 anyos nga komedyante misaysay nga aduna siya’y higala kaniadto nga ginganlan og Daniel nga mao ang mikuha og mga video kaniya sa iyang mga pakatok. Nagtuo na sab siya nga didto na unta magsugod ang iyang pagsidlak apan naudlot kini tungod kay na-corrupt ang memory card nga gipanag-iya sa iyang higala.
Bisan pa man og pakyas ang pagpakita niya sa iyang mga kalingawan, gidala na lamang niya ang maong pangalan nga ‘Baby Dragon’ gumikan kay dako ang iyang pagtuo nga moabot ang panahon nga maila ra sa kadaghanan ang iyang pangalan nga mopaagik-agik sa kadaghanan.
Tuig 2018, gihagad siya sa iyang higala nga mo-produce sa iyang himuon nga vlog.
“Kani na vlog was under Dodong TV a ug naka-produce ta at least 4 episodes. However due to some personal conflicts na stop ang production”, matud pa niya.
Nakat-on si Baby Dragon nga maninguha og iyaha nga mopadayon og pabuhagay sa makalingaw niya nga mga mugna.
“As time goes by, ako nalang ang nagkuha og video sa akong self and gitabangan pud ko sa akong friend nga si Lyle Go. Grabe ka supportive ug successful gyud ang namugna natu,” niya pa.
Puno gihapon sa inspirasyon si Baby Dragon nga mobahin sa iyang makalingaw nga mga ideya sa mga pakatok bisan pa man og dili igo ang iyang mga kahimanan tungod kay pinangga niya ang iyang fllowers ug dili kini niya nga biyaan og pakyason.
Tuod man, bisan sa puno og positibo nga awra ni Baby Dragon, matud pa niya nga tawo ra sab siya sama sa uban nga adunay mga pait nga kasinatian sa kinabuhi.
Usa sa mga dili niya mahikalimtan mao ang sitwasyon nga hapit niya nga dili na mahikauban ang iyang inahan nga si Corazon gumikan kay gipapili sila kaniadto sa doktor kun kinsa ang angay nga buhion --- ang ilang kinamanghuran nga anak ug ang iyang inahan. Dakong pasalamat sa iyang pamilya gumikan kay ang duha luwas ra kini.
Lima ka managsuon sila si Baby Dragon. Siya ang kinamagwangan. Matud pa niya nga malipayon ug grabi ka sadya ang pagpuyo ug pagpakabuhi sa iyang pamilya.
“Akong childhood kay grabe kalingaw. Kusog kaayu ko muduwa og chinese garter ug ako jud na pirme ang mother. Unya kusog kaayo ko mudagan sauna basta magduwa name ogg syatong”, asoy pa niya.
Puno sa pagmahal ang pamilya nga nahisakupan ni Baby Dragon. Matud pa niya nga bisan og adunay mga pagtamay-tamay nga nahitabo sa iyang kinabuhi, wala niya pagdag-a ang mahimong miserable ug magpadala sa istorya sa uban.
During teenage days kay niagi pud ko og bullying. Muana ang uban "bayot ka, wala kay kwenta" "itom kayka walay mahigugma nimu" ug uban pa. Pero ako lang gyud positive ug sabot para dili sakit”, pulong pa niya.
Gipalabay lang kini ni Baby Dragon gumikan kay matud pa niya nga mas importante ang pagmahal nga iyang madawat gikan sa iyang amahan nga si Allan kaysa sa mga tawo nga dili kaayo niya igtagsa apan gihukman siya.
“Grabe kaayo ka supportive akong papa kay bisan og na-feel nako nga dili ko niya dawat sa akong pagka-ako pero iya ko gisuportaran kay gipangga ko niya ug gipalitan ko niya og daghang clips sauna pagbata nako nga parehos kang Jolina Magdangal”, siya mibahin.
Sa pagdagan sa panahon, miabot sab sa punto nga dili na makasustinir ang iyang ginikanan sa ilang mga panginahanglan gumikan kay nagdungan na ang mga gastuhan sa iyang mga igsuon ilabi na sa iyang mga manghod nga nagtungha sab.
“Abi nako og dili ko makahuman og college pero naningkamot jud ko maong nisulod jud ko og mga part-time job while ga- skwela”, suma pa niya.
Usa sa iyang mga nasudlan nga trabaho mao ang tig-tutor og mga Korean students matag gabii sa mismo nga panimalay niini. Sulod sa upat ka oras ang gigahin niya sa pagtudlo.
Hago alang kang Baby Dragon ang manginabuhi samtang nga nagtungha apan tungod kay dili niya gusto nga isakripisyo ang iyang edukasyon, gibuhat kini niya aron nga makalampos.
Ug nahinayon gyud ang iyang gipangandoy. Natapos ni Baby Dragon ang iyang pagtungha. Natapos niya ang kurso nga BS Development Communication sa Cebu Technological University Main Campus niadtong 2012.
Usa na lamang ang wala mahitabo sa iyang kinabuhi ug mao kini ang mahimong usa ka opisyal nga housemate ni Kuya sa Pinoy Big Brother.
“I have been auditioning PBB for how many times pero pirmi rako shortlisted. Dili jud ko mo-give up hangtud mahimong housemate ni Kuya”, suma pa niya.
Alang kang Baby Dragon, moabot ra ang iyang panahon kun itugot sa Ginoo.
Sa pagkakaron, nagtrabaho na siya isip usa ka Telemarketer & Engagement Officer sa usa ka dako nga kompanya dinhi sa Sugbo.
Padayon nga naghatag og kalingawan si Baby Dragon pinaagi sa iyang Facebook page nga ‘Baby Dragon’.
Q AND A
BNH: Lisod ba gyud mahimong tigpakatawa sa uban?
BABY DRAGON: Lisud jud magpakatawa og taw kay dili tanan ganahan sa akong humor. Maong every day, I’m learning on how people can relate sa humor na ako gina-share.
BNH: Unsa ang imong mga gikahadlukan?
BABY DRAGON: Gikahadlukan nako na matiguwang na walay enough nga tinigum. Lisod kaayo kung wala tay igong tigom. At least kay na ta’y pang back up anytime.
BNH: Unsa ang imong mga plano sa kinabuhi?
BABY DRAGON: Makaangkon og negosyo, especially coffee shop. To become a celebrity soon