CEBU, Philippines – Nadisgrasya ang usa local actor niadtong Domingo sa hapon samtang paingon sa shooting sa pelikula’ng “Jacqueline Comes Home” nga ubos sa direksyon ni Carlo J. Caparas.
Giila ang maong local actor nga si James Ezekiel, 23 anyos ug taga Mambaling niining dakbayan.
Matud pa nga nagmaneho siya sa iyang motorsiklo paingon sa dakbayan sa Carcar dihang nitumaw ang disgrasya paghiabot niya sa syudad sa Naga.
Nagka bangga matud pa ang motor nga iyang gimaneho ngadto sa laing motorsiklo.
Nahiagum si Ezekiel og mga samad ug mga pangos ug kasamtangang nagpaalim niini sa ilang panimalay.
Nahusay ra sab sila ug ang iyang kabangga.
Dungan niini, nitumaw sa Facebook ang mga komentaryo batok sa production team sa nahisgutang pelikula nga matud pa walay pagpakabana sa local talents nga nalakip sa maong proyekto.
Wala matud pa’y gihatag nga sakyanan ngadto sa local talents hinungdan nga napugos si Ezekiel pagmaneho sa kaugalingon niyang motor paingon sa location sa shooting.
Suma pa nga dihang gipahibawo ni Ezekiel ang production team kabahin sa iyang nahiaguman, igo ra kining nangayo og pasaylo ngadto kaniya ug walay timailhan kon tabangan ba siya sa galastuhan niini.
Gisuwayan og kuha sa Banat News Hugyaw ang habig sa production team pinaagi kang Ann Angus, line producer sa maong pelikula, apan namahayag kini nga aduna pa siya’y meeting busa dili pa siya makatubag.
Imantala lang unya sa Banat News Hugyaw ang habig sa production team sa higayon nga muluwat na sila og opisyal nga pamahayag.