CEBU, Philippines — Nahugyaw ang fans ni Morissette Amon human gideklara ni Asia’s Song Bird nga si Regine Velasquez-Alcasid nga bag-ong rayna sa pag-awit ang Sugbuanon nga singer.
Martes sa gabii didto sa Big Dome, gisaysay ni Regine nga maisip na si Morissette nga usa sa mga bag-ong superstar sa karon nga henerasyon.
Dili pa lang dugay, nagmalampuson ang concert sa 21- anyos nga singer nga nag-ulohan og “Morissette is Made”.
Nahitabo ang maong deklarasyon human sa ilang duet sa “You Are My Song” diin nahimong emosyonal si Morissette tungod sa iyang nadawat nga pagdayeg gikan sa iyang idolo.
"You are incredible. I am so happy for you. You deserve everything, all of the attention, because you are such a talented young girl. Alam mo, gagaling ka pa. Natutuwa ako na you just waited for your turn, and now this is your turn. I just want to say I think we have produced another superstar”, pulong pa ni Regine.
Malipayon usab si Regine nga usa siya sa nahimong guest performer sa first major concert ni Morissette.
“It's an honor for me to be part of this concert and to actually see your star shine so bright. Kahit hindi man ako naging parte ng iyong career, I feel very proud”, suma pa ni Regine.
Tumang kalipay ang gibati ni Morissette gumikan kay nahitabo ang maong deklarasyon sa iyang first major concert nga wala niya damha.
Si Morissette nagsugod sa showbiz human siya niapil sa talent search sa TV5 nga Star Factor sa edad nga 14 anyos. Gani, gisudlan usab niya ang kalibutan sa teatro ug nalakip sa "Camp Rock" ug niadtong 2013, nalakip siya sa "The Voice of the Philippines" ug nakasulod isip finalist diin misulbong na pag-ayo ang iyang karera.
Dugang pamahayag ni Regine ngadto kang Morissette nagkanayon, "Queen ka na. Hindi mo na kailangan ng baton ng iba. Hindi ko kailangan ipasa ang baton, because for me, I think, you are already a queen."
Mas nikusog gyud ang pagpakpak sa mga tawo sa dihang gipamulong sa Asia’s Songbird ang "So how about a big hand for our new queen!"