CEBU, Philippines - Ang kanhi ka loveteam ni Alden Richards nga si Louise Delos Reyes, hingpit nang mitapon sa tugkaran sa Kapamilya Network.
Kini human gikumpirmar sa Dreamscape nga malakip siya sa usa sa top rating primetime series sa Dos nga "Ang Probinsyano".
Taud taud nang nahilom ang karera sa aktres sa GMA-7, ang TV network nga naghupot niya kaniadto.
Daan nang napanglantawan ang pagtapon niya sa Dos sukad na-expire ang iyang kontrata sa GMA-7 ug nipasilong dayon sa Viva Artist Agency.
Gusto sa aktres nga duna pa siya’y mapamatud-an sa iyang acting skills isip artista.
Makauban niya sa iyang paglugwa sa Ang Probinsyano mao silang Ejay Falcon, Dominic Roque ug Ron Morales. Modala siya isip PO3 Katrina Velasco.
Hinuon wala na mohatag pa og dugang detalye ang Kapamilya Network kalabut sa iyang role sa maong serye nga gibidahan ni Coco Martin. (BANAT NEWS)