CEBU, Philippines - Gi-upload ni GMA7 entertainment reporter Nelson Canlas sa iyang instagram account sa nilabay nga adlaw ang matud pa hulagway sa suwat sa 11-year old nga anak ni Derek Ramsay nga si Austin. Unod sa maong suwat matud pa ang pagpadayag sa bata sa iyang tinguha nga mapriso ang iyang amahan aron makasinati kini unsay bation kun sinalikway.
Gikatahong iduso matud pa ni Austin ang duha ka pahina nga suwat ngadto sa prosecutor’s office, may labot sa kasong paglapas sa Anti-Violence Against Women and their Children’s Act, nga gipasaka sa inahan sa bata nga si Mary Christine Jolly batok kang Derek. Kahinumduman nga nireklamo si Jolly nga nahiagom siya ug ang iyang anak og “ emotional, psychological, ug economic abuse” gumikan kay kasado sila ni Derek apan gibalewala matud pa sila niini.
Hugot nga gihimakak sa kampo sa aktor ang tanang pasangil ug matud pa aduna na silay ebidensya nga mumatuod nga nagsustento ang aktor ngadto sa iyang anak.