CEBU, Philippines - Laing mga Cebuana na usab ang nakalangkat og titulo sa natad sa kaanyag. Kini pinaagi sa Little Miss Solane, diin ang nidaog mao sila si Duchess Blythe Uybengkee sa Teenies category ug Marydee Manayaga sa Cuties category. Si Duchess lumad nga taga Mandaue ug si Marydee taga Mambaling, niining dakbayan sa Sugbo. Ang maong pageant gihimo didto sa SMS Aura Convention Center, Taguig City dili pa lang dugay.
Ang siyete anyos nga si Marydee gipakpakan og maayo sa audience gumikan sa gipakita niining dancing skills ug sa ka maayo niini motubag atol sa Q & A portion. Si Marydee kinsa first time nga nisalmot og pageant, nakadawat usab og special award nga Miss Beautiful Face.
Sa Teenies category , ang 13- anyos nga si Duchess nga usa ka aspiring theatre actress, nisaysay nga ikaduhang higayon na niya nga nisalmot sa maong indigay , ug nalipay siya nga naangkon na gyud niya karong tuiga ang gikahinamang titulo.
Siya usab ang nakadaug sa Yupangco Music Academy best in Talent para sa iyang interpretasyon sa "The Little Mermaid Classic, Part of Your World"
Ang duha nakadawat og cash prize nga nagkantidad og P50,000 ug laing P50,000 nga balor sa scholarship ug developmental programs. Gihatagan usab sila og prebiliheyo nga maka-apil sa nagkadaiyang kalihukan sa Solane sama sa outreach program, trade shows ug uban pa nga special events.
Samtang ang ubang mananaug naglangkob nila ni Steph Redne Yamut sa Cebu (1st runner-up / cuties category) ug Ma. Dominique Trillana sa Manila (1st runner-up- Manila/ teenies category), Ashley Arindain sa Quezon City (2nd runner-up/ cuties category) ug Kyla Angelica De Catalina sa Davao City (2nd runner-up/ teenies category).
Matud ni Ramon del Rosario, Isla LPG Corporation CEO nga ang "Little Miss Solane 2014" makahatag og higayon ngadto sa mga kabatan-onan nga makakat-on og bag-ong butang para sa ilang kaugalingon ingon man usab sa pagpalambo sa ilang talento.
"The exposure gained from this pageant will certainly help them to be better people for their families, friends and community" matud pa ni del Rosario.