CEBU, Philippines - Nagpusot-posot karon ang suwerte sa singer-songwriter nga si Taylor Swift human kini pormal nga gipaila-ila sa miaging adlaw isip “Billboard's Woman of the year” ug siya maoy pinakabata nga singer nga makadawat sa maong klase nga pasidungog.
Ang album ni Taylor nga “Speak Now” maoy usa sa best seller didto sa Amerika kung diin ang 11 sa 14 niya ka mga kanta nasulod sa Billboard Hot 100 charts sulod sa usa ka semana.
Moabot ngadto sa 20 million ka kopya sa album ni Taylor ang nahalin karong tuiga ug 40 million na usab ang mi-download sa iyang mga awit.
Gikatakda nga madawat ni Taylor ang iyang award atol sa 2011 Billboard Women in Music nga mahitabo karong December didto sa New York.