Dara Park shines

CEBU, Philippines – Bag-o pa lang gilusad ang unang digital single sa Korean girl group nga 2NE1 nga giulohan og “ Fire”, apan karon gitakda na sila nga motekang sa Los, Angeles aron makig-alayon sa musical artists sa Amerika. Ang 2NE1 mao ang grupo diin sakop ang kanhi “Pambansang Krung-Krung” nga si Sandara Park, nga karon naila na sa Korea isip Dara Park.

Ang tsika mao nga ang pango sa YG Entertainment nga maoy agency sa 2NE1 nga si Yang Hyun-suk, suod sa chairman sa Interscope Records nga nagbase sa LA, hinungdan nga nahimugso ang gilaraw nga musical collaboration. Mahitabo ang pagbisita sa 2N1 sa LA sa katapusang bahin sa Hunyo o sa sayong bahin sa Hulyo niining tuiga.

Ang Interscope matud pa maoy producer sa album nila ni Lady GaGa, M.I.A, Pussycat Dolls, ug Timbaland. Suma pa nga ang pakig-alayon og American record label maoy uso karon sa Korea, sanglit ganahan ang mga Koreano nga maminaw og American music, kaysa ilang kaugalingong musika.


Show comments