COTABATO CITY, Philippines — Sinunog ng mga operatiba ng pamahalaan ang hindi bababa sa P13 milyon na halaga ng marijuana sa isang uprooting operation na isinagawa sa bayan ng Kalingalan Caluang sa Sulu nitong Martes.
Kinumpirma ni Christian Frivaldo, director ng Philippine Drug Enforcement Agency-Bangsamoro Autonomous Region in Muslim Mindanao (PDEA-BARMM), ang pagkakasamsam sa naturang mga marijuana na nakatanim sa isang liblib na lugar sa Barangay Pitogo, Kalingalang Caluang.
Ayon kay Frivaldo, ang naturang operasyon ay magkatuwang na isinagawa ng PDEA-BARMM, mga kasapi ng iba’t ibang unit ng Sulu Provincial Police Office at ng Police Regional Office-Bangsamoro Autonomous Region.
Sa ulat ng Kalingalan Caluang Municipal Police, mabilis na nakatakas ang ilang armadong lalaking nagbabantay sa naturang plantasyon ng Marijuana nang mapunang may mga palapit na mga agent ng PDEA-BARMM, mga pulis at mga tropa ng 21st Infantry Battalion ng Philippine Army sa kanilang kinaroroonan.
Agad namang sinunog ng mga agent ng PDEA-BARMM at mga pulis ang mga nabunot na daan-daang puno ng marijuana matapos kumuha ng ilang piraso upang magamit na ebidensya laban sa grupong nagmamay-ari ng naturang mga illegal na pananim.
Ayon kay Brig. Gen. Allan Nobleza, director ng PRO-BAR, magtutulungan ang local government ng Kalingalan Caluang at ang lokal na pulisya na kilalanin ang mga may-ari ng nakumpiskang marijuana plants upang makasuhan sa korte.