Mister kinatay ng dayo na dumalaw lang sa ina
CAVITE, Philippines — Tadtad ng saksak sa buong katawan ang isang mister makaraang pagsasaksakin ng isang dayo na nakaalitan nito, kamakalawa sa Brgy. San Lorenzo Ruiz 2, Dasmariñas City.
Patay na bago pa man naitakbo sa pagamutan ang biktima na nakilalang si Jaime Dando Caldo, nasa hustong gulang, at residente ng nasabing lugar.
Arestado naman ang suspek na nakilalang si Rodolfo Taga Rivera, nasa hustong gulang.
Sa imbestigasyon ng pulisya, alas-11 ng umaga nang maganap ang insidente sa Blk. H1 Excess Lot, Brgy. San Lorenzo Ruiz 2, Dasmariñas City.
Nabatid na dumalaw lamang umano ang suspek sa ina nito sa nasabing lugar nang makasagutan nito ang biktima.
Nauwi umano sa mainitang pagtatalo ang bangayan hanggang sa mapikon ang suspek at undayan ng sunud-sunod na saksak ang biktima.
Naitakbo pa ang biktima sa pagamutan subalit hindi na umabot pang buhay.
- Latest
